Fauler Sack?

„Guck ämol do niwwer, Fraa! Do driwwe steht er – stell der vor, am hellichte Daach! Ja, des is er werklich, de Hannes, der mit de Gips in de ääne Hand.

Am Fußgängeriwwergang – unn die Ampl steht uff grie, siehscht des?

Jetzt beißt er mit viel Genuss in sei Kaffeestückl nei, des wu er grad vorhin in dere Bäckereifilial gekaaft hot! Glaabscht des, die Ampl schalt um uff rot unn der regt sich net vum Fleck! – Was macht der dann do?

Hot der nix zu due, der faule Sack, wie blooß des schääne alte Haus uff dere annere Seit a´zugucke? Wääscht, des Haus aus gelwe Backstää mit denne filigrane Fenschtereifassunge unn denne ausrachende Simsdääle?

Der guckt des a´, vun unne bis nuff zu denne Mansarde! Jetzert schalt die Ampl um uff grie unn er rennt mit all denne haschdiche Mensche iwwer die Strooß!

´s is kaum zu glaawe, wie der die Weiwer a´glotzt – bis dief in ihrn Ausschnitt – unn wie der die Tätowierunge vun denne junge Kerl inschbiziert!

´s letscht, wie ich den Hannes getroffe hab, hot er mer verzehlt, er wär en Schriftsteller, Autor unn sogar emol Stadtschreiwer gewest.

Was sucht dann der do uff de Strooß anstatt dehäm vor dere troschtlose Taschtatur vun seim Compjuter ä Buch zu schreiwe?

Vor ennre halwe Stunn hab ich´n uff emme Stuhl vorm Strooßecafe gsäähne, ä Gips zwische de Zäh unn hot lauter Raachwolke genussvoll in die Luft gebloose. So ebbes macht mer doch net, so viel Kohledioxid in die Umwelt zu paffe, wu doch des Ozonloch immer größer werre dut.

Dann hot er korz die Aachelider gschlosse, dann sei Notizblöckl unn de Füllfedderhalter aus de Hosedasch gholt unn ebbes uffgschriwwe!

Ab unn zu hot er ach en Schluck Kaffee aus dere große Tass zu sich genumme.“

Wann ich mir des allerdings durch de Kopp gehe loss, kummen mir doch so Zweifl, ob der werklich so en fauler Sack is, wie ich vorhin gemäänt hab.

Jetzert geht er niwwer in de Bahnhof unn fahrt mit em Zuch hääm! – …unn dann? –

Dann setzt er sich an die Taschtatur vun seim Compjuter unn schreibt en 20-Zeiler vun dere schääne Stadt mit denne alte Haiser, dem gute Kaffee, dem wohlriechende Duwakduft, denne hibsche Fraue – unn warum? Ich wääßes! Er schreibt damit so en alter fauler Sack, wie ich, der wu schun Rente kriecht ebbes Schäänes zu lese hot – desweeche!“

Autorelos

Manche Autore hänn´s doch schwer,

erscht fahr´n se hie – kummen dann her,

hänn in de Welt sich rumzutreiwe

unn sollen dann noch ebbes schreiwe!

Kä Zeit, kä Zeit

Ä Lesung hab ich ´s letscht geplant

zum 30. April.

Des hab ich viele Leit verzehlt,

´s kann kumme grad wer will!

De Maier Sepp hot zu mir gsaacht:

„Ich hab do ebbes vor,

mir üwen grad fer ä Konzert

in unserm Kerchechor!“

De Lina hab ich´s ach verzehlt,

doch die saacht: „Es is schade,

mei U´kraut wachst so furchtbar wild,

do muss ich in de Gaade!“

De Hannes treff ich uff de Strooß

bei emme Haufe Leit.

Der määnt: „Sei bitte mir net bös,

en Rentner hot kä Zeit!“

Die Lisbeth, die sunscht ganz allää,

deet der so ebbes gfalle?

„Ach wääscht, Heinz“, saacht se:,

„ich bin alt, mich störn die Leit do alle!“

Letschtendlich hab ich mir gedenkt:

´s is sicher jo net schää,

wann kääner uff die Lesung kummt,

dann les ich halt allää!“

Begrüßungskiss

Vun de Franzose, muss mer wisse,

die dun sich beim Begrüße kisse

unn ich finn des ach äfach gut,

wammer sich so begrüße dut!

Mer derf sei Freunde so beglücke,

ä Kussl uff de Backe drücke,

unn wann ä prallie Frauebruscht

sich an mich drickt, isch´s ach ä Luscht!

Wann so ä Fraa, die parfümiert

sich zum Begrüßungskuss net ziert,

riecht nooch Parfüm besond´rer Note

isch´s Schnuppere ach net verbote.

Ach frää ich mich als alter Mann,

dass ich so was erlewe kann!

Jedoch hab ich dobei Bedenke,

dut mer dir ach Bazille schenke?

Denn uff des Zeich kann mer mitnichte

beim beschte Wille gut verzichte!

Franzose tu seit langer Zeite

um die Begrießung ich beneide.

Blooß d´Eskimos tun´s annerscht treiwe,

tun d´ Nase als ananner reiwe!

Mitbringsl

„Mein liewer Mann, ich hätt en Wunsch:

Du kännscht in d´Stadt nei laafe.

Ich butz dehääm die Wohnung durch,

´s wär ebbes eizukaafe.

Do nemm den Eikaafszettl jetzt,

schenier dich norre nit,

siehscht was im Lade, wu dir gfallt,

dann bringscht des ach noch mit!“

Nooch ennre gschlachne ganze Stunn,

do steht er vor de Deer:

en ganzer Korb voll Lewensmittel

unn dodezu noch mehr:

Unn zwar ä hibschie, jungie Fraa,

wie aus em Ei gepellt

„ich hab gedenkt, ich nemm se mit,“

hot er sie vorgeschdellt.

„Was willscht du dann mit deere do?“

saacht sie, „die brauch mer nit!“

„Du hoscht doch gsaacht, wann dir was gfallt,

dann bringcht des ach noch mit“!

Leider (zum Neujahrstag)

Hundert Mal dich zu umarmen

und einmal dabei geküsst,

möchte´ ich dich zum Neujahrstag,

weil das etwas Schönes ist!

Leider ist es mir nicht möglich,

weil ich jetzt nicht kommen kann.

Vielleicht kann er es für mich tun,

frag´ihn doch mal – deinen Mann!

Winterschloof

Wie schade, dass de Herbscht jetzt kummt,

de Summer saacht: „adschee“!

En Pulli hot es ganz verdeckt,

dei schäänes Dekoltee!

Doch nooch em lange Winterschloof,

wu´s Dekoltee verdeckt,

werd´s vun de warme Sunnestrahle

schnell widder uffgeweckt!

net immer leicht

Manchmol isch´s net leicht mitnichte

iwwer en Mensch ebbes zu dichte,

den mer eichentlich net kennt

unn der in de Welt rumrennt!

Ich fass mer äfach bissl Mut

unn meischtens geht des ach not gut!

Dummer Auguscht?

Määnscht du, der Auguscht, der wär dumm

unn bringt uns blooß zum Lache,

der führt uns an de Naas erum

unn losst es manchmol krache?

Määnscht du, der Auguscht, der wär dumm,

deet in der Welt verzaache?

Nää – der losst uns fer korzie Zeit

´s Lewe besser ertraache!

Wääscht, so en Auguscht is nett dumm,

der bringt uns mit Geschick

im Zirkus, wann er uns vergnügt,

Kindheitserinnrung z´rick!

net ämol beim Strooßekehre

„Alter schaff dich mol doher,

muscht dann schunn widder dichte?

Selbscht als Rentner is als noch

ä annrie Ärwet zu verrichte!

Siehscht dann nett in unserm Gaade

´s Ukraut wuchert dort unn sprießt,

die Tomate, die hänn Dorscht

unn warten druff, dass mer se gießt!

Am Klääderschrank sinn Schrauwe locker,

unn ´s gheert de Hof gekehrt,

enn Troppe Leim fehlt unserm Hocker,

de Müllämer ghert ausgeleert!“

Eichentlich, do hot se recht,

dehääm is werklich viel zu mache,

denn mit de Zeit do gehn kaputt

glaabscht´s nett – so viele Sache.

Ich mach´s jo werklich liewend gern,

schaff die Ärwet still unn stumm,

doch es geht mer immer ebbes

laufend in meim Kopp erumm!

Beim Dichte, Denke, Iwwerleeche,

loss ich mich nett gern störe,

beim Bossle an de Werkbank nett

nett mol beim Strooßekehre!

Kennscht denn?

Wer dappt dann do im Derfl rum?

Der grüßt mich immer wann ich kumm!

Hockt morgens schunn vergniecht vorm Lädl,

trinkt Kaffee unn liest´s Zeitungsbläätl!

Doch heit, do hab ich ihn getroffe,

er is de Buckl nuffgeloffe.

An seiner Hand zum Zeitvertreib,

fiehrt er ä wunnerhübsches Weib.

„Wer is dann des?“ hab ich gedenkt.

„Hot der sei Herz ihr grad verschenkt?“

Er sieht jo ganz pasabl aus.

Is der verliebt – mich beißt die Laus?

Drickt er se lieb, dut er sie kisse?

– Ich muss jo ach net alles wisse –

Himmelhoch

En Dichter in de Himmel hewe,

unn zwar mit viel Bedacht,

verdient hot er´s, weil sicher er

schääne Gedichte macht.

Beim Dichter in de Himmel hewe,

hab ich mich druff besunne,

dass es vielleicht doch besser wär,

er bleibt noch bissl hunne!

Dampf ablosse

Uff unsrer Welt, wie ich se kenn,

gibt’s Leit, wu was zu motze hänn.

Geht irgendwu mol ebbes schief,

schreiwen die glei en Leserbrief,

denn Ärger gibt’s oft riesegroß

unn iwwerall is ebbes los.

Mer macht sich Luft dann bei dem Schreiwe,

fangt langsam a ganz ruhig zu bleiwe.

Am End is mer ganz prima druff,

schlacht daachelang die Zeitung uff.

Den Leserbrief, den mer do gschriwwe,

is in de Schublaad blooß gebliwwe

vum Redaktör der Daacheszeidung

´s war ganz umsunscht die Vorbereitung.

Leit, die wu schreiwen so fer Bosse,

hänn wengschdens Dampf mol abgelosse!

Mehrwertschdeier gschenkt?

„Damit ´s Produkt net werd so deier,

schenken mer dir die Mehrwertsteuer!“

So ähnlich hääßt´s in der Reklame

unn drunner steht de Firmename.

Hoscht du´s Finanzamt dann betrooche

unn ach die Steuer hinnerzooche,

wann des Produkt, wu du bestellt?

Dofor zahlscht dann wennicher Geld?

Kriegscht vielleich noch ä schlecht Gewisse,

falls du´s Finanzamt hättscht beschisse?

Odder du denkscht uff dere Welt:

„der Staat hätt´jo genüchend Geld!“

Unn so wie mer des alsmol wisse,

werd´s Geld doch´s Fenschder naus geschmisse!

So was is Aachewischerei,

der Kunde fräät sich wohl debei

obwohl mer ihn debei verkohlt,

ä Blum seim Backe uffgemolt!

Vun der Reklame hab ich´s satt:

„Gebt ihm doch äfach mehr Rabatt

in Höh vun dere Mehrwertschdeier,

dann werd der Eikaaf net so deier!

Er wääß: „´s Finanzamt net zu stroofe“

unn kann denooch viel besser schloofe!

Summervergnieche

´s is Summerzeit unn schwül dezu

ich guck so manche Fraue zu,

die leicht bekleid´t unn u´scheniert

zeichen, dass se tätowiert!

Ennie hot sich korz entschlosse

ä schäänie Blum steche zu losse.

Im tiefe Ausschnitt uff ihrm Rücke

is Filigranes zu erblicke

bei enre hübsche Kreatur

mit ennre zierliche Figur!

Ä annrie hot sich zugetraut

ä ganz Gesicht uff ihrer Haut.

Guck mol, dort zeicht uff ihrer Bruscht

ä Fraa – ausgefallnie Lewensluscht.

Am Buckl sieht mer als debei

ä wunnerschäänes Hirschgeweih.

An so em Summerdaach, em hääße,

do brauchscht du gar kä Buch zu lese.

Betrachtescht du so manchen Leib,

is des en schääner Zeitvertreib.

Blooß manchmol hot ä Blus versteckt,

was sunscht noch so dehinner steckt!

So Zeich ob vorne, seitlich, hinne

is ach bei Mannnsleit als zu finne!

Gekehrt, g´schippt unn gebabbelt

Wan d´Schtrooß kehrscht, triffscht du jedermann

ob Mann, Kind odder Fraa.

Selbscht die, wu mer net leide kann,

die sieht mer leider aa.

Die ääne winken dir blooß zu,

die annre halten a´,

gar mancher losst dir schää dei Ruh,

än ann´rer hupt: „trara“!

Grüßt mer: „Grüß Gott, gut´n Dach, hallo!“