Impressum

Autorin:

Bildrechte

Lektorat:

Satz und Gestaltung

Druck:

ISBN: 9783744832755

Inhaltsverzeichnis

• Moin
• Mien Opa
• Mien Oma
• Oostern
• Noch eben en Tass Tee
• Vögelschiet
• Sömmerdag
• Urlaub
• Rüggpien
• Dat neje Huus
• Brummelbeeisaft un Eiersneei
• Dat reisende Volk
• De Schösteinfeger
• Roggenmehlflupp
• Tuffel söken
• Sünnermarten
• De Puppke ohn Haar
• Ieslopen
• Wiehnachten
• Über die Autorin Monika Müller

Moin

1962 was en gode Jahrgang, ik bün geboren, an en mojen Dag in Juli. In een lüttje Buurnhuus, wurr ik mit mien Ollen, twee Geschwister un Oma un Opa upwursen bün. Mien Grootollern harren dree Koije, en Peerd, Höhner, en paar Kanienen un en Hund. Kennt ji „ Wir Kinder von Bullerbü?“ So ähnlich hebbt wi ok leevt. Vörn harren wi uns Wohnköken, waar sük allens ofspölen de. Daar wurr eten, spölt, Huusupgaben maakt, eenfach allens. De Ovend gaff sien beste, wi harren noch kien Heizung.

In d` Winter weren in de Fensters Iesblömen, un wenn wi ruutkieken wullen, denn hebbt wi mit uns Aam en lüttjet Kieklock an Schiev pust. Mitunner lag de Sneei metershoch. Boven harren wi twee lüttje Zimmers. In de en schlepen mien Ollern un mien Süster un in de anner mien Bröör un ik. Wenn wi up Klo mussen , gungen wi dör de Stall an de Kohjen vörbi up Plummsklo. En Klo mit Spölung harren de wenigsten.

In Tuun was allens dat, wat wi to Leven bruken. Tuffels, Gemüüs, Obst ut egen Tuun. De Kohjen levern d` Melk. In` t ganze Huus gaff dat blot en Kiekkasten, wenn överhoopt. De meeste Tied weren wi buten, spölten in d` Sömmer mit Marmels, kropen up Boom, gungen schwemmen in d` Kanaal, Winters wurrren Sneeimanns baut, un Höhlen ut Sneei, en Sneeibahn achtert Huus waar wi mit de Schlee runner suust sünd. Wi gungen Schöfeln, un kwemen mennigmaal kolt un dörnatt na Huus hen. Oma hett uns de Footen freven, daarmit de weer warm wurren .

Krank wurren wi selten. Ik hebb mien Kindheit in en goode Erinnerung un denk daar faken an torüüg. Uns wurrren noch Werten bibrocht, wat vandaag faken verloren geiht. Wi hullen tosomen, egal wat kweem. Fründe gaff dat hopenwies, kieneen wurr mobbt.Ik wünsch mi dat de Kinner van vandag ok seggen könnt, dat se en moje Kindheit hat hebbt, un hoop dat wi wiederhen in en friedlichen Welt leven könnt.

Mien Opa

Van mien Oma Lini hebb ik jo ja al vertellt. Nu is mien Opa Hillrich dran. Mien Opa was genau dat Gegendeel van Oma. He stunn noch immer up de Meenung, well nich hören will, mutt föhlen. Dat hebb wi Kinner ok woll mal to spören kregen. Of un to gaff dat en goden Pack vull schellen. Aver denn harren wi ok sülvst schuld.

Wi wassen as Kinner ja ok nich immer ganz so leev, as wi egentlik wesen sullen.

Uns Opa harr en lüttjen Buurnhof, dree Kohje, en Perd, Stück of wat Höhner, twee Schwien, paar Karnickels un een Zegenbuck. De Zegenbuck stunn immer unner de Obstboom un freet dat Gras of, denn bruukde Opa daar nich maihen, wi harren to de Tied noch kien elektrisch Rasenmaiher oder so` n Rasenmaihertrecker. Nee, Opa muss dat Gras mit Seis maihen. Um sük daar en bietje Arbeit to sparen, hett he de olle Zegenbuck köfft. Uns Naber van tegenöver harr dat sehn, dat de Zegenbuck immer dat Gras bi uns upfreten de. Dat funn he ja maal ganz mooi. De Naber froog uns Opa of he de Buck nicht ok mal bi freten laten kunn. „Ja", seggt Opa, „ dat kann ik woll mal doon."

En paar Dag later weer dat denn sowiet. In en Hand en Hamer und in de anner Hand dat Tau mit de Zegenbuck daaran, leep he na`t Naber. Wi Kinner düssen nich mit , wi sünd up uns Grundstück stahn bleven un hebbt uns dat van daar ut ankeken. Opa gung mit de Zegenbuck up Rasen und wull hüm ansticken. He buckde sük um de Sticker in d` Grund to hauen. De Buck stunn achter hüm. As uns Opa sük bucken de, nohm de Buck Anloop und suus up uns Opa daal. Opa hett daar nix van mitkregen. De Buck stöttde hüm so van achtern mit sien Hoorns in sien Allerwertesten. Opa kreeg en gode Stööt un floog vörut in`t lang Gras. De olle Zegenbuck hett dat Wiede söcht. Opa stunn up, hüm was Gott sei Dank nix paseert.

Man ik much nich in de Huut van de Buck sitten, as Opa hüm to packen kregen hett.