För Kuddel, de mi op een Wannerung na Nordstrandischmoor op de Idee to de Halligmörder bröcht hett.
Für Kuddel, der mich auf einer Wanderung nach Nordstrandischmoor auf die Idee zum Halligmörder gebracht hat.
De Kirl stunn inne Bargen anne Afgrund un keek rünner. Ünner em een wenst zweehunnert Meter hoge Klintwand.
He harr alns verkehrt makt bi dat Opbuun vun sien niege Leven. Keen Haven, an dit Gebot harr he sik holn. Man dat anner Gebot – keen Kanon – harr he nich inholn.
Een Johr lang harr he sick knapp ut sien Bood ruttruut. Hüüt harr he nu endli een Utflug inne Neegte wagt. Dorbi weer he de Festung wieswurrn – veele Kanonen. Un as he op de Festungsmuur luerte, weer he de Fru wieswurn. Se har em ok sehn: enn slechte Teeken. Nu würr alns wedder vun vörn anfangen un dat würr wedder een Dode geven. He wuss noch wodenni dat Malöör anfung:
Fred seet in sien leevste Kroog un weer mismödig. Siet sien Fründin em verlaten harr, gung alns den Bach rünner. As he noch fast bunnen weer, hummelten de smucksten Fruunslüüd mit em rüm. Nu weer he blots noch Luft för de Wiever.
He bruukte mal wedder een Fru in't Bett. Anne Vöravend weer he dör de Danzlokale inne Naverdörper tourt, hopte dorbi, een Deern för'n One-Night-Stand – so nomte man dat hüüt wull – to finnen. Twee Dörpschönheiten leeten sik de heele Avend lang vun eem frieholn, man denn wur he versett. Se harrn een Deernsavend makt un sik achterran von se's Mackers afholn laten. Fred weer denn inne Dämmerung vunne Morn bös untofreeden na Hus fohrt und harr de Buddel Rum leer makt, de he tohuus funnen harr.
Hüüt avend würr he sien Moneten sachs wedder inne hiesige Puff laaten, denn de Jiper weer wedder dor, nadem dat Knastpiepen verswunnen weer.
De Deerns dor bedeenten em fründlich, man he wurr dat Geföhl ni los, dat se em heemlich utlachten. Wegen dat muss he sik nu eerstmal Mood andrinken. De anner Kirls anne Tonbank wussen dat un grienten em an. Fred stierte op sien Beer, dormit he nich wedder op se's dösige Snacken hörn muss. Bannig asig weer, dat Claas Jensen ok dor weer.
Nadem he de arvte Hoff ganz un gar rünnerwirtschaftet harr un de kort vör de Dwangsaukschoon stunn, weer Claas op Mal to Geld komen. He exporteerte sien Beester düchtig als Tochveeh na Nordafrika. Af un an reiste Claas ok mit sien Veeh na Nordafrika. He begrünnede dat dormit, dat he de niege Egendömers de Eegenheiten vun Holsteiner Köh verklooren müss. Siet dem keek de ole Klassenkamerad vun boben op Fred dal, obschonst de em eerst de Scholafsluss möglich makt harr, wiel he em jümmers avschrieven leet. Fred fraagte sick mennigmal, wat de Lybier an de Viechers funnen, de de hiesigen Veehhöker knapp as Slachtveeh kopen wulln.
Mitmal hörte dat Snacken op'n Slag op. Nieschirig keek he hoch. Dat kunn ni wahr ween: entweder weer he böös besopen oder he harr sick middelwiel dootsopen un seet in Heven op Wolk söven. De Erscheenung weer ni vun düsse Welt. Vör aln weern son Fruunslüüd normalerwies ni an Steeden as sien Kroog to finnen, ganz un gar ni in dit lütte nordfriesische Kaff an't Enn vunne Welt.
Fred kunn de Ogen ni vun ehr laten. Enge swatte Jeansbüx, een swattet Top, dat dat Kieken op een good formte Vörbuu lenkte, Ledderjack, un – dat faszineerte eem an dullsten – bruune Hoor bet na de pralle Achtersen. Jichtens keem em disse Fru sünnerlich vertruut vör. Se smusterte na em.
Dat Glück weer blots kort. As Fred noch överlechte, sien Gesich noch 'n beten schlauere Utdruck to geven, gung Class na de Fru henn un ladte ehr to'n Beer in. Se keek sik kort üm un schüttkoppte. Denn gung se jüstemang op Fred to. He kunn dat ni glööven. Dat müss een Droom ween.
»Moin, Fred!«
He keek ehr an as'n Gespenst. Meente se em? Dat kunn doch ni wohr ween. Se smusterte na em.
»Verwessel ik di? Büst Du ni Fred? Ik meen de lüttje Broder vun Sylvia...«
Nu kennte he ehr. De Droomfru ut sien junge Johrn, de he nümmers vergeten harr. Sonja weer de beste Fründin vun sien öllere Süster ween, de he vun Wieden anhimmelt harr.
Se weer jümmers fründlich ween, man vun wegen de veer Johr Öllersünnerscheed weer ehr dormals ni bitokamen wesen. Överto weer he veel to bang ween, ehr vun sien Geföhle to vertelln.
Na de School weer se mitmal verswunnen. Dat hedte dormals, se weer na Israel gahn, in een Kibutz. Dat weer inne Meern vunne achtiger Johr ween. Böse Tungen vertellten sogor, dat se för de Mossad arbeiten de. Man so weer dat Schludern op't Land nu mal, wenn Minschen anners weern.
»Dumm Tüüch«, dach Fred as he sik dorop besunn. Sonja weer inne School jümmers een verdrechliche Minsch wesen, de keen Fleeg wat dohn kunn.
He rekente na. Sonja müss weens fiefunveerdig Jahr oold ween. Se seech so unverschamt smuck ut, dat he ehr op höchstens inne Meern vun de Dördig schätzt harr. Sien Liev reageerte dull op ehr. He hopte, dat se de Buul in sien Büx ni wieswurr.
Vun wiedem hörte he ehr Stimm.
»Knallköm oder Whisky? Wodenni wöllt wi unse Weddersehn fiern?«
Fred keek ehr fraagend an un versoop tiedglieks in ehr grööne Ogen. De Sinn vun ehr Wöör weer bi em ni ankomen.
»Ick much Di to de Fier vun unse Weddersehn inladen. Magst Du Knallköm oder Whisky?«
Dat kunn blots 'n Droom ween.
»Whisky«, stammelte he.
Se prosteten sik to un dorna leep de Tied veel to gau. Lang snackten se över de gooden oolen Tieden. Fred weer glücklich. Elendigerwies vertellte Sonja wenig över sick sülmst, obschonst se veel beleevt harr. Studeert harr se in't Utland. Nu levte un arbeidete se in Amerika. Man ni direkt – se arbeidete för'n amerikansche Firma un weer inne Verkoop rund üm 'n Globus ünnerwegens. Fred kunn sik nix dorünner vörstellen, man he weer glücklich. Tofreeden wurr Fred dat fünsche Kieken vun Claas un den annern wies.
Dat weer al hell, as se tosomen ut de Kroog weggungen. Fred bröchte Sonja noch na ehr Ferienwahnung. Ehr Öllern harrn de Stadt vör veele Johr verlaten un weern na Berlin trocken. So müss se nu to Miete wahnen. Elendigerwies wull se em ni inne Wahnung laten, sünnern verafscheedte sik anne Döör. För de neegste Dag harrn se sik avers to spazeern anne Strand mit anslutend Kaffeedrinken veravredet.
Fred wurr fröh morns waken un weer jiddelig. Wurr Sonja wohraftig komen? De Vörmiddag wull keen End nehmen. Man op Sonja weer Verlaat: Pünktlich stunn se in Freesennerz un Gummisteeveln vör sien Döör – de typischen Touristen-Plünnen. Fred griente, denn doran markte he, dat Sonja lang weg wesen weer. An düsse Dag wurr dat sachs ni regen.